د بدخشان په جومات کې د جنازې په مراسمو چاودنه په پراخه کچه وغندل شوه

| 06-11-2023

په افغانستان کې د افغانانو په منځ کې داسې ډلې پیدا شوې چې په لومړي سر کې یې د جوماتونو او ښوونځیو په بمبارولو سره خپل کار پیل کړ، د سیمې روڼ اندي، دیني عالمان او مشهور شخصیتونه یې ووژل. د نړۍ ټول هېوادونه هغه بېلابېلې ډلې چې د افغانستان خلک وژني راډیکال ګروپونه بولي او وایي چې هر هغه څوک چې له دې ډلو سره اړيکې لري، ترهګر دی او په سر يې بهرنيو هېوادونو انعامونه ایښي دي. د هغو کسانو لپاره چې د هغوی په هکله معلومات ورکوي، انعامونه اعلان شوي، او د دوی د وژلو لپاره میلیونونه ډالر وړاندیز کیږي. څو کاله وروسته هماغه ترهګره ډله چې په افغانستان کې یې په زرګونو بې ګناه خلک شهیدان کړل، د بهرنیو هېوادونو مشرانو له افغانستان څخه بهر د هماغې ترهګرې ډلې له استازو سره لیده کاته کوي او له بهرنیو هېوادونو څخه مالي مرستې ترلاسه کوي. ورپسې کال دوی هماغې ډلې ته چې افغانستان یې وراناوه، د حکومت واګي سپاري. د دې ډلو تر شا بهرني لاسونه دي. د افغانستان خلک په یوه یا بله پلمه وژل کیږي. دا د مسلمانانو کار نه دی. دا کارونه چې په افغانستان کې کېږي، دا د اسلام د دښمنانو کارونه دي، نه د مسلمانانو.

| 06-11-2023

داسې ښکاري چې نوې لوبه پیلېدونکې ده. بیا به د خلکو کډې ورپه شا وي. شاوخوا تېرې شل میاشتې خو مو ګڼ شمېر مشکلات وزغمل خو یو څه چې ډېر خوند یې کاوه هغه د امنیت شتون وو. واړه مسایل لکه غلاګانې، لارو کوڅو کې جنګونه... وو خو مګر چاودنې نه وې. خلکو څه ناڅه د ارام ساه اخیستله. خو که بیا جګړه پیل شي دا لږ و ډېر کارونه به هم ورسره ختم شي. اوس خو بیا هم ګوزاره روانه ده. خو یاره لکه چې بهرنۍ استخباراتي شبکې مونږ په ارام نه پرېږدي. چې دوی زموږ په وطن کې څه لیدلي؟ ولې مو ارام ته نه پرېږدي؟ ولې مو نه پرېږدي چې خپلو کې سره روغه جوړه وکړو او پنځه ورځې په ارامه ژوند وکړو؟ د بدخشان په مرکز فيض اباد کې چې کومه پېښه شوې د افغان وطن د روان پنځه څلويښت کلن قتل عام يوه بله خونړۍ کړۍ ده. موږ ځکه جګړه او افراطيت د خپل وطن د عزت ناموس دين او اخلاقو د سوځولو اتشکده ګڼله چې پر هيچا د رحم عاطفه يې نه درلوده، مګر اوسني حاکمانو او ځینو پخوانیو چارواکو غوږ نه نیوه. د فيض اباد قتل عام نه لومړۍ پېښه ده نه وروستۍ، خو موږ يې وروستۍ کولای شو. هغه داسې چې د افغانستان اوسني واکمنان ووايي چې راځئ ملي صف وتړو يو د بل حق ومنو، انحصار سنګسار کړو او د افراطيت هره هڅه د يوه پراخ ملي تړون په زور شنډه کړو. الله دې ورحميږي

| 06-10-2023

دلته هره وژنه او هره چاودنه د غندنې وړ ده. دلته د پردیو استخباراتو هره جنګي پروژه د غندنې او لعنت ویلو ده. سړی حیران شي چې نړیوال اخر له افغانانو څخه غواړي. البته یو خبره ښه روښانه ده چې مشکل ټول په افغانانو کې دی. افغانانو د هر پردي استخباراتی چينل د جنګ د موسیقي مختلو تالونو ته ګډا کړې او دومره ګډا چې خپل خلک ترې هېر شوي. افغان خاوره داسې ګاونډیان لري چې تر لیونیو سپیو ډېر بدتر دي. له تېرو پنځه څلوېښت کلونو راپدیخوا د افغانستان ګاونډیو د دین په نامه په دې خاوره کې جګړه روانه کړې. که د دین خبره شي، دا په اصل کې په مطلق ډول ناسمه خبره ځکه ده چې افغانان د نړۍ یواځني مسلمانان دي چې ګاونډیان یې له بې علمۍ ګټه اخلي. که لږ نور وضاحت ورکړو، معنی دا چې افغانان مسلمانان دي خو جاهل مسلمانان. همدا جهالت دی چې د څو مزدورو افغانانو له امله په هېواد کې جګړه پنځه څلوېښت کلنه شوه او بیا هم پای معلوم نه دی. د افغانستان د جوړېدو یواځنۍ نسخه دا ده چې افغانان په خپلو کې سره راټول او یو بل ومني. که دغه نسخه عملي نه شي، پوه شه چې جګړه نوره هم اوږدېږي او داسې اوږدېږي چې نوم به د دین ورکول کېږي خو په اصل کې به بل څه وي. له لسیزو را پدیخوا افغانان صرف د جنګ د خامو موادو په حیث استعمال شوي. په دې خاوره د جنګ د اوږدولو څو علتونه دي؛ د اوبو پر سر جنګ: که په دې خاوره ناامني وي، اوبه به ګاونډیانو ته بې حسابه او بې اندازې ورځي. د مارکېټ جنګ: دا وطن د ګاونډیانو د تولید ښه مارکیټ دی. منځنۍ اسیا ته لاره: افغانستان د منځني اسیا مرکز دی. حتمي ده چې ګاونډیان به دلته داسې څه کوي چې منځنۍ اسیا ته د خپلو تولیداتو په لېږد رالېږد کې له خنډ سره مخ نه شي. نو خبره دا ده چې د افغانستان امن د افغانانو په لاس کې دی...