اېم آی ۵ خپلې هڅې ګړندۍ کوي ترڅو په افغانستان کې د داعش خراسان څانګې د بیا راپورته کېدلو پر وړاندې مبارزه وکړي

کابل -- د برتانیا د داخلي استخباراتو اداره (اېم آی ۵) په افغانستان کې د داعش خراسان څانګې د فعالیتونو د زیاتېدلو په ترڅ کې د بهرمېشتو ترهګرو ډلو په ګواښ باندې تمرکز کوي.

د اېم آی ۵ عمومي رییس کین مککلم د تلې په ۱۷مه په لندن کې وویل، د داعش او القاعدې ګډ ګواښ«داسې تروریستي جریان دی چې ما ډېر اندېښمنوي،»

هغه وویل، «نن داعش هغه ځواک نه دی چې یوه لسیزه مخکې و، خو ... هغوی د ترهګرۍ د صادرولو هڅې بیا پیل کړي دي،»

هغه وویل، «په مسکو کې د داعش خراسان څانګې برید د هغې د وړتیاوو یوه وحشیانه مظاهره وه.موږ او ډیری اروپایی همکاران په خپلو وطنونو کې داعش پورې تړلی فعالیت کشفوو، او وار له مخه یې شنډوو.»

هغه وویل، «په تېره میاشت کې زموږ د لوړې سطحې د لومړیتوبونو له یو پر درې برخې څخه زیاتو څېړنو ... له بهرمېشتو ترهګرو ګروپونو سره یو ډول تړاو درلود،»

هغه زیاته کړه، «موږ ډېرې داسې قضیې هم وینو چې په کې ډېر ځوانان زهرجن آنلاین افراطیت ته ورکش کول کیږي،»

مککلم د برمنګهم د دوو ورونو یادونه وکړه چې د تېر لړم په میاشت کې په افغانستان کې د داعش خراسان څانګې سره د یوځای کېدلو په هڅه کې په بند محکوم شول.

هغه وویل، نورې مسئلې چې چارواکي ورسره مبارزه کوي، له «آنلاین نفرت، د دسیسې تیوریو او ناسمو معلوماتو» څخه سرچینه اخلي.

مک ککلم وویل، «موږ دیری داسې بې ثباته اشخاصو سره مخ کیږو چې غواړي ترهګر شي مګرم د هغو ایډیالوژیو په هکله چې دوی یې تعقیبوي، لږ معلومات لري،»

ملګرو ملتونو د چنګاښ په میاشت کې په افغانستان کې د داعش او القاعدې په ګډون د ځینو ډلو د مخ په زیاتیدونکيو فعالیتونو او نړیوال امنیت ته د هغوی د احتمالي ګواښ په اړه خبرداری ورکړ.

په کور دننه او بهر تهدیدونه

په همدې حال کې، د کابل چارواکو په وار وار په افغانستان کې د داعش-خراسان مخ په زیاتیدونکي فعالیتونه رد کړي دي.

په پاریس کې مېشت افغان سیاسي شنونکي، محمد عمر سعیدي وویل، د هغوی له خوا ځواب نه ورکول د داعش خراسان څانګې ګواښ د افغانانو او ګاونډیو هیوادونو لپاره لاپسې زیات کړی دی.

هغه سلام ټایمز ته وویل، «د داعش په څېر تروریستي ډلې او القاعده نه یواځې د افغانانو بلکې د سیمې امنیت هم ګواښي،»

هغه وویل، «له بده مرغه، د کابل حکومت لپاره دا ناشونې شوې چې د یادې ډلې د پیچلیو عملیاتو او بریدونو مخه ونیسي،»

د کابل اوسېدونکی، ۴۲ کلن منصور حسیني وویل، افغانان د تروریستي ډلو، په ځانګړې توګه د داعش خراسان څانګې د بیا راژوندي کېدلو په اړه ژوره اندېښنه لري.

هغه وویل، «د کابل حکومت د داعش خراسان پر وړاندې کمزوری عمل کوي، خو دغه وینه زبېښونکې ډله، لکه څنګه چې موږ په تیرو وختونو کې لیدلي دي، زموږ خلک وژني،»

حسیني وویل، که د کابل اداره د داعش خراسان پر ضد مرستې ته اړتیا ولري، نو باید «نړۍ واله مرسته وغواړي. موږ یواځې ژوندي پاتې کیدل غواړو... او حکومت باید زموږ امنیت تامین کړي.»

ډګروال صبغت الله محمدي، چې اوس په اسلام اباد کې اوسېږي، وویل، ترهګرې ډلې افغانستان یوه دوستانه سیمه ګڼي ځکه چې د هغوی پر وړاندې په رسمي توګه د اقدام نشتوالی ګاونډیو هېوادونو ته د هغوی نفوذ اسانوي.

هغه وویل، «په افغانستان کې ترهګرې ډلې، په ځانګړې توګه داعش خراسان څانګه او القاعده، پرمختګ ته دوام ورکوي،»

هغه زیاته کړه، «د داعش خراسان څانګې د افغانستان په شمال کې وده کړې، د تاجک او ازبک ټولنو له منځ نه کسان استخداموي، او په غرنیو سیمو کې یې د وسلو او مهماتو ذخیره زیاته کړې ده.»