د نړۍ والې ځپنې د پراختیا په لړ کې، پاکستان د داعش خراسان څانګې فعال محاکمه کړ

اسلام اباد -- امنیتي سرچینو وویل، پاکستان د روانې نړۍ والې مبارزې په لړ کې د داعش پر وړاندې عملیات ګړندي کړي دي، مهم فعالان یې نیولي او د بند سزا یې ورکړې ده.

د سلواغې په ۲۴مه، د پنجاب په ساهیوال ولسوالۍ کې د ترهګرۍ ضد یوې سیمه ییزې محکمې د داعش-خراسان څانګې فعال عثمان سعید ته د ۳۱ کلونو بند سزا واوروله.

داعش-خراسان په افغانستان او پاکستان کې د یادې ډلې سیمه ییزه څانګه ده.

نیوز ډرم راپور ورکړ، د پنجاب پولیسو د ترهګرۍ ضد څانګې ویلي چې سعید د یوې ترهګریزې پیښې په تړاو تر تعقیب لاندې و او په جهنګ ولسوالۍ کې یې د «فرقه ییز برید» پلان درلود.

د هغه نیول د داعش-خراسان د تاوتریخوالي په وړاندې د پاکستان د شدید غبرګون یوه برخه ده،چې په کې د ۱۴۰۲ د چنګاښ په میاشت کې د باجوړ ولسوالۍ په یوه سیاسي غونډه کې ځانمرګی برید شامل دی چې له ۶۰ څخه ډېر کسان یې ووژل.

باجوړ په پاکستان کې د داعش-خراسان د فعالیتونو لپاره یو مهم مرکز پاتې شوی، او دا ډله په سیمه کې څو وژونکي بریدونه تنظیموي.

د امنیتي چارواکو او کارپوهانو په وینا، د تحریک طالبان پاکستان او القاعدې په شمول ترهګرو ګروپونو پر وړاندې د پاکستان دوامدارو اقداماتو هم د داعش-خراسان سیمه ایز شتون د پام وړ کمزوری کړی دی.

دوی وویل چې دا وضعیت پاکستان او افغانستان دواړو ته ګټه رسوي.

نړۍ وال ځپونکي اقدامات

په یوه وروستي راپور کې، د ملګرو ملتونو د امنیت شورا د تحلیلي ملاتړ او بندیزونو څارنې ټیم روښانه کړه چې د داعش-خراسان څانګې «د پام وړ شاتګ» کړی دی.

تېر اوړی، د پاکستان امنیتي ځواکونو په پاکستان کې د بهرنیو عملیاتو د څانګې جوړولو په تړاو د داعش-خراسان څانګې هڅه ناکامه کړه، د دې ډلې څو «لوړ پوړي» فعالان یې ونیول او د ډلې سیمه ایزې شبکې ته یې ګوزار ورکړ.

په راپور کې ویل شوي چې د نیول شویو کسانو په منځ کې «د هغو کسانو په شمول چې د ایران اسلامي جمهوریت په کرمان او مسکو کې په بریدونو کې ښکیل وو، د جنګیالیو او ځانمرګو بریدګرو د استخدام، سفر او تمویل مرکزي شخصیتونه موجود ول،»

د ترهګرۍ ضد چارواکو په وینا، د داعش-خراسان څانګې پر وړاندې د پاکستان مبارزه د دې ډلې د مرکزي مشرتابه او سیمه ایزو ملګرو د له منځه وړلو لپاره د پراخو نړۍ والو هڅو یوه برخه ده.

په اسلام اباد کې د ترهګرۍ ضد لوړ پوړي چارواکي محمد حفیظ وویل، «په کرمان کې د ۱۴۰۳ د مرغومي برید او په مسکو کې د ۱۴۰۳ د کب برید په ګډون په سیمه کې د داعش-خراسان څانګې عملیات، د دې ډلې د له منځه وړلو لپاره د همغږۍ نړیوالو هڅو اړتیا په ګوته کوي،»

د قانون پلي کونکو نړیوالو ادارو په مختلفو هیوادونو کې د داعش او د هغې د ملګرو د نفوذ د مخنیوي لپاره هڅې ګړندۍ کړې دي.

د ترهګرۍ ضد پولیسو په وینا، د سلواغې په میاشت کې، د برتانیا یوې محکمې فرشته جامي وروسته له هغه چې افغانستان ته د داعش-خراسان سره د یوځای کیدو لپاره یې سفر وکړ، د ترهګرۍ په جرمونو مجرمه وپېژندله.

همدارنګه په سلواغه کې، د سوېډن یوې محکمې یو سړی په سومالیا کې «په یوه ترهګریز سازمان (داعش) کې د ګډون» او «د ترهګرۍ تمویل» په تور محکوم کړ.

ای اېف پي راپور ورکړ چې دا د ترهګرۍ ضد قوي قوانینو لاندې لومړی داسې محکومیت و چې د ۱۳۹۶ لمریز کال د سټاکهولم برید څخه وروسته چې پنځه کسان یې ووژل، وروسته نافذ شو.

صباح ورځپاڼې راپور ورکړ، د ترکیې د کورنیو چارو وزیر علي یرلیکایا د سلواغې په ۱۷مه په ۲۱ ولایتونو کې په همغږو چاپو کې د ۱۶۴ شکمنو کسانو د نیولو اعلان وکړ.