متحده ایالاتو او پاکستان په ګډ کار سره د کابل د هوايي ډګر په برید کې ښکېل جګپوړی فعال نیولی دی

هرات -- د داعش خراسان څانګې یو جګپوړی فعال چې په ۱۴۰۰ لمریز کال د کابل په هوايي ډګر کې د هغې بمي چاودنې په تور تورن دی چې ۱۳ امریکایي سرتیري او ۱۷۰ افغانان یې ووژل، د کب په ۱۵مه لومړی ځل د متحده ایالاتو په محکمه کې حاضر شو.

د پاکستان لومړي وزیر شهباز شریف وویل، محمد شریف الله، چې د جعفر په نوم هم پیژندل کیږي، د «پاکستان-افغانستان په سرحدي سیمه کې د ترسره شويو بریاليو عملیاتو» په ترڅ کې ونیول شو.

د متحده ایالاتو ولسمشر ډونالډ ټرمپ د کب په ۱۴مه کانګرس ته په خپله وینا کې وویل، «زه په خوښۍ سره اعلان کوم چې موږ همدا اوس د دې وحشت مسؤل جګپوړی ترهګر نیولی دی،» او د شریف الله د نیولو په برخه کې د مرستې لپاره یې له پاکستان څخه مننه وکړه.

متحده ایالاتو په شریف الله باندې د یوې ترهګرې ډلې لپاره د داسې مادي ملاتړ او سرچینو چمتو کولو او دسیسې جوړولو تور لګولی چې په پایله کې یې مرګ ژوبله رامنځته شول.

د متحده ایالاتو د عدلیې وزارت وویل چې شریف الله د کابل هوايي ډګر ابي دروازې ته د تللې لارې د څارلو اعتراف کړی، او دا هغه څای دی چې وروسته یوه ځانمرګی بریدګر د خلکو په منځ کې خپل چاودیدونکي توکي وچول.

د عدلیې وزارت د اسنادو له مخې، د داعش خراسان څانګې فعالانو هغه ته د کشفي ماموریت لپاره ټیلیفون او سیم کارډ چمتو کړي وو.

سیمه ایزو امنیتي شنونکو سلام ټایمز ته وویل چې دغه په لوړه سطحه نیونه د داعش-خراسان څانګې د فعالانو په وړاندې د نړۍ والې مبارزې شدت په ګوته کوي.

په هرات کې مېشت پوځي کارپوه ولي محمد حسین سلام ټایمز ته وویل، «د ترهګرۍ پر وړاندې مبارزه کې د متحده ایالاتو او د هغې د متحدینو ترمنځ استخباراتي او نظامي همکاري ډېره زیاته شوې ده،»

هغه وویل، «د پاکستان له خوا د کابل هوايي ډګر د برید د عاملانو نیول د دې زیاتې شوې همکارۍ یو ښه مثال دی،»

د امنیتي کارپوهانو په وینا، دا ډول نړۍ وال ګډ عملیات د ترهګرو شبکو د قوماندې او کنټرول وړتیاوې په مؤثره توګه ګډوډوي.

د ترهګرۍ ضد ملګرتیا

په هرات کې مېشت سیاسي شنونکي محمد ناصر هروي سلام ټایمز ته وویل، «د داعش خراسان څانګه په نړۍ واله کچه د ټولنیزو رسنیو د شبکو او پېچلیو ارتباطي میتودونو په کارولو سره فعالیت کوي،»

هغه وویل، «د دې ترهګرې ډلې پر وړاندې مبارزه د هېوادونو ترمنځ د دوامدارو استخباراتي معلوماتو شریکولو او همغږو نظامي عملیاتو پرته ناممکن دي،»

د عدلیې وزارت په وینا، د دې ډلې د لاسرسي نور شواهد هغه وخت راڅرګند شول چې شریف الله اعتراف وکړ چې د ۱۴۰۳ د وري په میاشت کې د مسکو د کروکس ښار په تالار د برید له عاملانو سره د وسلو د روزنې ویډیوګانې شریکې کړې وې.

په هرات کې مېشت د نړۍ والو اړیکو کارپوه جواد فرزان سلام ټایمز ته وویل، د داعش خراسان څانګې په افغانستان او پاکستان کې د خوندي پټنځایونو د جوړولو هڅه کړې ده.

خو هغه وویل، د شریف الله نیول ښیي چې د هیوادونو ترمنځ د معلوماتو مفصل شراکت په سیستماتیک ډول د ډلې لاسرسی څومره کمزوری کوي.

شریف په خپله اېکسپاڼه له ټرمپ څخه د پاکستان د ترهګرۍ ضد هڅو د منلو له امله مننه وکړه او ژمنه یې وکړه چې «د سیمه ایزې سولې او ثبات په خوندي کولو کې له متحده ایالاتو سره نږدې ملګرتیا ته دوام ورکړي.»

فرزان وویل، «هېڅ ترهګره ډله د ملتونو د یووالي او همکارۍ په وړاندې مقاومت نشي کولی. هرڅومره چې پوځي او استخباراتي ملګرتیا پیاوړې وي، هغومره د ترهګرو سازمانونو له خوا د هدفونو د ترلاسه کولو چانس کم وي.»