په بادغیس ولایت کې د زلزلې له ټکانونو څخه وروسته ژغورونکي د ژوندیو پاتې کسانو لټون کوي

هرات -- چارواکو وویل، ژغورونکو د سې شنبې په ورځ /د مرغومي ۲۸مه/ په لیرې پراته ولایت بادغیس کې له یوې زورورې زلزلې څخه د ژوندیو پاتې شویو کسانو لټون کاوه. دغې زلزلې لږ تر لږه ۲۲ کسان ووژل او ودانیو ته یې «درانه» زیانونه ور واړول.

د دوشنبې د ماسپښین ۵.۳ درجې زلزلې چې ژوروالی یې لږ وو، قادس ولسوالي چې یوه لیرې پرته سیمه ده او د سړک له لارې ورتګ اسان نه دی، ولړزوله.

د بادغیس ولایت ویاند بازمحمد سروري په یوه ویډیوي پیغام کې وویل، «یادې زلزلې کورونو ته سخت زیانونه ور واړول؛ او له ۷۰۰ څخه تر ۱۰۰۰ پورې کورونه یې ویجاړ کړل.»

په افغانستان باندې وار له مخه یوه بشري ناورین منګولې ښخې کړي چې د زمري په میاشت کې د افغان حکومت له نسکورېدلو څخه وروسته له بد نه پسې بدتر شو.

دغه راز، دا هېواد په ۱۴۰۰ کال کې د لسیزو بې ساري وچکالۍ سخت وځاپه.‌

سروري وویل چې ۲۲ کسان وژل شوي او څلور ټپیان دي، او د مړو پخوانی شمېر یې چې هغه دوشنبه ناوخته ای اېف پي ته ۲۶ کسه ورکړی وو، اصلاح کړ. هغه وویل، په مړو کې څلور ماشومان هم شامل دي.

هغه په خپل وروستي ویډیوي پیغام کې وویل، «امکان لري چې تلفات زیات شي..»

په ټولنیزو رسنیو خپرو شویو عکسونو کې د ماشومانو په ګډون اوسېدونکي لیدل کیږي چې د کورونو په ورانو ویجاړو کې لټون کوي.

د زلزلې مرکز له قلعه نو سره نږدې وو

د متحدو ایالاتو د جیولوجیکي سروې ادارې وویل، د زلزلې مرکز د بادغیس له مرکز قلعه نو سره نږدې او د ترکمنستان له سرحد څخه له ۱۰۰ کیلومترو څخه لږ لیرې وو.‌

ملګرو ملتونو ویلي هغوی د روان ۲۰۲۲ میلادي کال په ترڅ کې ۵ میلیاردو ډالرو ته اړتیا لري چې په افغانستان کې د روان بشري ناورین مخه پرې ونیسي.

متحدو ایالاتو د مرغومي په ۲۱مه ژمنه وکړه چې په روان کال کې د افغانستان لپاره په ابتدایي توګه له ۳۰۸ میلیونو ډالرو څخه ډېره مرسته برابره کړي.

یوې ویجاړوونکې وچکالۍ ناورین لا نور سخت کړی، او په دې ترڅ کې زلزلې قادس چې یوه له ډېرو اغېزمن شویو سیمو څخه ده، وځپله.

افغانستان په ځانګړې توګه د هندوکوش غرونو د لړۍ په اوږدو کې، چې د ایرو ایشین (اروپایي اسیایي) او هندي جوړښتي پلېټونو د اتصال سیمې سره نږدې پرته ده، زلزلې ډېر ځپي.

ان کمزورې زلزلې کولی شي چې په دغه بې وزلي هېواد کې په ناسم ډول جوړو شویو کورونو او نورو ودانیو ته غټ زیان ور ورسوي.‌

په ۱۳۹۴ کې په افغانستان او پاکستان کې له ۳۸۰ څخه ډېر خلک هغه وخت ووژل شول چې د ۷.۵ درجو په قوت یوې قوي زلزلې د دواړو هېوادونو تر منځ سیمو ته ټکان ورکړ او په پاکستان کې یې ډېر خلک مړه کړل.‌

په هغه ناورین کې،‌ ۱۲ کوچنۍ افغانې نجونې هغه وخت په ګڼه ګوڼه کې تر پښو لاندې او مړې شوې چې هڅه یې کوله د خپل ټکان خوړلي ښوونځي له ودانۍ څخه وتښتي.‌